LEGAZPI CITY-Nangapudan an Philippine National Police-Anti-Cybercrime Group (PNP-ACG) sa mga mambabatas na amyendahan an SIM Card Registration Act.
Segun sa PNP-ACG Director Major General Wilson Casil Asueta, kadaklan sa mga kaso nin cybercrime sa nacion may kinaaraman liwat sa mga subscriber identity modules o SIM cards.
Bakong epektibo an nasabing ley, kaya importante sa mga mambabatas na magpasar nin mas makusog na bersyon kaini.
Nagkapira sa mga itinaong halimbawa kan opisyal kan pulisya na may kinaaraman sa paggamit nin SIM cards, iyo an scamming, online gambling asin identity exploitation.
Sinabi niya na sa presenteng ley, nadidipisilan sindang mag-monitor kaini huli sa dakol na nawawarang probisyon kabali na an SIM Card Registration Act.
Nagkapira sa mga bagay na pigbubusol kan PNP-ACG, iyo an identity authentication asin activation kan SIM cards only makalihis an authentication asin registration.
Magigirumduman na pinirmahan ni Presidente Ferdinand Marcos Jr. an SIM Card Registration Act o Republic Act 11934 na nagtatao nin liability sa paggamit nin SIM Card sa krimen asin makakatabang sa mga awtoridad na marikas na mabisto an mga nagsasagibo nin krimen.
