LEGAZPI CITY—Mahigot ngunyan an pag-monitor kan kapulisan sa Catanduanes sa mga pantalan asin coastal areas makalihis na magpaluwas nin executive order na nagbabawal sa paglaog kan hogs, pork, pork-by products huli sa huma kan African Swine Fever (ASF).
Segun ki Catanduanes Police Provincial Office Public Information Officer Police Lieutenant Colonel Emsol Icawat, sa intrevista kan Bombo Radyo Legazpi, katabang ninda sa pag-monitor an mga lokal na gobierno asin an Provincial Veterinary Office urog na kan may nairehistrong urig na nagpositibo sa nasabing helang partikularmente na sa banwaan kan Virac asin Pandan.
Kabale man sa may mga ibinugtak na border control points an banwaan kan San Andres, Bato, asin Virac.
Sa ngunyan wara pa man sindang nairerehistrong nagbabalgar sa nasabing orden.
Mientrastanto, pangaoudan ni Icawat sa publiko na tabangan an mga concerned agencies sa paglaban kontra sa African Swine Fever; siring man an pagtaong impormasyon sa agricultural officers urog na kun may nagpositibo sa helang nganing matawan nin magkakanigong aksyon asin mapugulan an paglakop pa kaini.
