LEGAZPI CITY-Pigkakarkulong 17,300 na residentes o 4,622 na pamilya sa Pampanga an nagtetenir ngonian sa 270 evacuation centers sa bilog na probinsya huli sa matindi asin padagos na pagbaha.
Segun ki Pampanga Governor Lilia Pineda, dae kabali sa numerong ini an mga residentes na piniling magtenir sa saindang mga harong sa ibong kan halangkaw na tubig baha.
Tinawang-duon kan gobernador na maski an mga lugar na dae pirmihang pigbabaha, apektado ngonian huli sa backflow kan tubig na dae tulos nakakabulos pasiring sa Manila Bay.
Kabale sa pinakamatinding naapektaran, iyo an banwaan kan San Simon, kun saen pigbaha an nagkapirang mga barangay kabale na an sarong porsyon kan North Luzon Expressway (NLEX).
Nadidipisilan man an mga otoridad na halion an tubig huli ta naglilibot sana ini sa lugar imbes na lubos nang maghupa.
Padagos an pakikipagkoordinar kan gobierno probinsyal sa mga alkalde asin mga opisyales kan barangay ngani na prayoridad an pag-ebakwar kan mga kaakian, mga may helang, mga senior citizens, asin bedridden residents.
Liwat na nangapodan si Pineda sa mga namamanwaan na mahigot na magsunod sa mga patanid kan gobierno asin para sa lambang pamilya na magpreparar nin sadiring emergency plan ngani na masierto an kaligtasan sa tahaw kan kalamidad
