LEGAZPI CITY-Dai mababa sa apat na parsela nin reclaimed land sa Taguig City an nabisto na “fraudulently” na nag-isyu nin titulo, segun ki Senador Panfilo “Ping” Lacson.
Ipigbuyagyag ni Lacson an mga detalye makalihis na suboot pauro-utrong hagadon saiya an ebidensya si Senate Minority Leader Alan Peter Cayetano dapit sa naenot niyang pagbuyagyag kan suboot illegal reclamation kan porsyon kan Laguna Lake na sakop kan Taguig.
An apat na parsela kabali an sarong 9,204-square-meter na daga na sakop kan sarong Administrative Patent asin may Original Certificate of Title o OCT; sarong 5,000-square-meter na daga na nag-agi sa Judicial o Ordinary Land Registration Processing asin may OCT; sarong 181,077-square-meter na daga na sakpop naman kan sarong Homestead Patent asin may sarong Transfer Certificate of Title o TCT; asin sarong 193,027-square-meter na parsela na igwang Transfer Certificate of Title.
Dae man pigluwas ni Lacson an mga pangaran kan mga tinawan kan titulo asin an OCT asin TCT number huli ta padagos pa an imbestigasyon.
Segun sa senador, apat pang parsela an warang plotted titled lots sa digital files kan Land Registration Authority o LRA.
Enot nang sinabi ni Lacson na pig-iimbestigaran kan LRA an ginikanan asin kasaysayan kan mga titulo na sakop kan pigkakarkulong 38.83 ektarya nin illegal reclaimed land sa Laguna Lake.
Basado suboot an mga nadiskubreng titulo sa mga dokumentong itinao kan Philippine Reclamation Authority o PRA sa saiyang opisina.
Sinabi ni Lacson na hahagadon niya sa LRA na i-backtrack an historya kan mga titulo nganing madeterminaran kun pano suboot ini pigmaniobra asin mabisto kun sisay an posibleng mapanimbagan sa kasong kriminal.
Posible suboot ining ideklarang warang bisa poon sa kapinunan kun an PRA magpoon kan forfeiture proceedings susog sa ley.
Sinabi man ni Lacson na nakatalaan na i-turn over sa Office of the Ombudsman an nagkapirang crates nin mga dokumento gikan sa DPWH may kinaaraman sa mga anomalya na proyekto sa Taguig City.
Mientrastanto, wara pang tugon digdi si Cayetano manungod sa mga alegasyon.
Magigirumduman na dati nang pinahimutikan kan senador an mga alegasyon kan mga pigsasabing “ghost” projects sa Taguig City.
