LEGAZPI CITY- Nanindugan an sarong grupo nin mga paraoma na dae dapat ibasol sana sa mga namamanwaan an food wastage sa Pilipinas.
Ini an kasunod kan datos kan Philippine Rice Research Institute na nasa 542,477 metric tons nin milled rice kada taon an nasasayang, rason ngani na ibusol kan Department of Agriculture an resposableng pagkonsumo.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na tunay na igwang mga nasasayang na pagkaon sa mga restaurant asin mga karinderya, alagad bako ini an solamenteng rason kan pagkakaigwa nin nasasayang na pagkaon.
Binanggit kan opisyal an kawaran nin mga post harvest facility asin drying facility na saro sa mga rason kaya dakol an nawawarang pagkaon sa Pilipinas.
Paliwanag ni Estavillo na sa labing pagtios ngunyan, warang siisay man na ordinaryong namamanwaan an boluntaryong magsasayang nin pagkaon.
Kasabay kaini, tinawan duon pa kan nasabing grupo an pangangaipo sa pagpapalangkaw kan lokal na produksyon ngani na magkaigwa nin kasiertuhan sa pagkaon.
