LEGAZPI CITY-Pinirmahan ni President Ferdinand “Bongbong” Marcos Jr. an sarong executive order na nagmamawot na ma-capitalize an mga kritikal na mineral kan nacion.
Segun sa Department of Environment and Natural Resources (DENR), nagpirma si Marcos kan Executive Order No. 122 na nagbubusol para sa Unified National Policy Framework for Development the Critical Minerals Industry.
Susog sa kasuguan igwa nin pangangaipo na magbugtak nin sarong magkakasundo asin pinagsararong national framework policy ngani mapakusog an Critical Minerals Industry kan nacion, mapauswag an pagproseso na may dagdag na importansya sa downstream industries, mapakarhay an mga pamumuhunan asin pagigin competitiveness, masierto an responsable asin sustenableng mga gawi sa pagmimina, asin i-harmonize an mga polisiya asin programa kan gobyerno na igwang relasyon didgi.
Basado sa orden, an nacion igwa nin dai mababa sa 9 milyones na ektarya nin mga prospective areas na pwedisir magkapot nin manlaen-laen na mineral resources ngani maibugtak an Pilipinas sa global value chain para sa mga critical minerals.
Sa irarom kan EO, an DENR ma-implementar nin sarong national program sa exploration asin reservation kan mineral ngani mamidbid asin ma-evaluate an mga bagong kritikal na deposito nin mineral, orog na an mga kaipuhan para sa malinig na enerhiya, digital transformation, asin pag-uswag kan imprastraktura.
An lakdang, nagtatao man nin mga lugar na sakop kan mga kanselado, nag-expire, nag-relinquish, nagsuko, o iba pang pinatalingkas na critical mining tenements na posibleng ikonsidera asin irekomendar para sa deklarasyon bilang mgacritical mineral reservation.
Dugang pa kaini, nangangaipo man para sa pag-streamline asin pag-digitalize kan proseso nin mga mining permitting process sa paagi nin sarong online one-stop shop.
An Department of Trade and Industry – Board of Investments an dapat man na mag-aalok nin mga insentibo sa irarom kan Corporate Recovery asin Tax Incentives for Enterprises Act para sa downstream refining, produksyon nin baterya, asin mga side-stream industries, mantang nagtatao para sa mga domestic processing plants nin prayoridad na access sa mga mineral ores sa patas na presyo sa merkado.
