LEGAZPI CITY-Pinaglalaoman kan Schools Division of Albay na magkaigwa nin implementasyon sa pagbabawal na paggamit nin social media o cellphone sa mga estuydante sa eskwelahan.
Segun kay SDO Albay Spokesperson Froilan Tena, nangangapudan siya sa mga magurang kan mga aki na disiplinahon an mga ini pag-abot sa paggamit nin social media o cellphone.
Pig-eenganyar man niya an mga magurang na makipagtabangan sa DepEd, mga paratukdo asin principal na suportaran asin makisumaro sa pagtatao nin giya asin disiplina sa mga joven o estudyante ngani dai na madifisilan sa pagataman kan mga ini, orog na pag-abot sa eskwelahan.
Tinawan doon man ni Tena, na bako maraot an gaming o pagkakawat sa cellphone alagad, an reyalidad kaini an mga nahihiling ninda sa kawat na nagluluwas digdi.
Para sa opisyal, sa sitwayson ngonian, dai na dapat pigpapagamit nin gadgets an mga aki o kaya naman dai na maggamit kaini tuyong oras nin pagklase.
Kun dai maiibitaran, dapat suboot na magtao sana nin oras para sa saindang paggamit asin bantayan asin hapoton an saindang piggigibo digdi, arog kan pagkawat o pakikipag-chat.
Basado kaya sa mga naireport kan pulisya, posibleng igwang mga manipulator sa social media na nakakaapekto sa mga jovenes.
Sa ibong kaini, padagos man an implementasyon kan SDO Albay sa mga eskwelahan na i-check an mga estudyante bago maglaog sa klase gamit an mga detector.
Alagad, pigkakahaditan man na igwang mga estudyante an dai nache-check huli ta pighahatod mismo kan mag behikulo sa laog kan eskwelahan, siring kan nangyari sa Zamboanga school shooting.
Propwesto kan opisyal na dapat warang secondary entrance asin magsagibo nin inspekasyon nsa mga estudyante asin iba pang personahes na malaog sa mga eskwelahan.
Mientras tanto, magsasagibo man an ahensya nin mga caravan, kun sain isasagibo an simpleng sesyon manungod sa mga ley arog kan anti-bullying act, safe space act, asin iba pa para sa mga jovenes.
