LEGAZPI CITY-Idineklara kan provincial government kan Catanduanes an temporary ban sa paglaog kan mga Hogs, Pork, Pork-by Products sa isla huli sa nakakaalarmang kaso kan African Swine Fever (ASF).
Sa irarom kan Executive Order No. 59 s. 2026, na epektibo ngonian na aldaw, Agosto 19, 2026, pinagbabawalan an paglaog kan anumang klase nin Hogs, Pork, Pork-by Products sa provincia.
Segun kay Catanduanes Governor Patrick Azanza, sa intrevista kan Bombo Radyo Legazpi, na ini ngani protehiran an provincia kan Catanduanes asin namamanwaan sa nakakaalarmang paglangkaw kan insidente nin ASF asin mawot nindang enoton an seguridad asin salud kan mga residentes.
Ipigsugo man an Provincial Veterinery Office bilang lead agency sa pag-monitor kaini katuwang an mga kapulisan, munisipyo, barangay, asin Philippine Coast Gurad ngani mabantayan an paglaog kan mga produktong ini.
Sa presente, negatibo man asin wara pang naire-report na insidente kan ASF sa provincia.
Dugang pa ni Azanza na proactive sinda pag-abot digdi asin nakikipagkoordinar na sinda sa local hog industry raisers.
Sinabi man suboot kan mga hog raiser na kakayanon ninda ini asin igwa man nin alternatibong pagkukuwaan nin produkto arog kan manok asin sira, enkaso maubusan nin suplay.
Obheto kan lakdang na ibitaran an pagpapalusot kan mga ilegal na transport gamit an pekeng dokumento kaya nagpapaotob sinda nin ban.
Dai man muna sinda magpapaluwas nin local suplay huli ta prayoridad ninda ini sa presente.
Sa ibong kaini, pigsierto kan opisyal na bastante pa an saindang suplay asin mahaloy pa ininin hasta sarong bulan.
Nakadepende man suboot sa sitwasyon an paghale kan ban, kun sain enkaso maglala pa, mas mahaloy an pagbabawal kaini, alagad kun magin kontrolado na, posibleng halion na an ban.
Padagos an monitoring asin kooperasyon kan provincial government sa mga barangay level ngani maprotehiran an salud asin industriya kan local hog raising.
