LEGAZPI CITY-Natuklasan kan mga astronomer sa England an kaenot-enoting sarong green star sa kalawakan na pig-aapod na WD J1330+6435, sarong white dwarf na mahihiling sa 280 light-years na distansya gikan sa Earth.
Susog sa mga pag-aadal na pinangenotan kan Astrophysicist na si Mark Hollands gikan sa University of Warwick sa England, nagkaigwa nin kulay “chartreuse [shaar-trooz] green” na bituon makalihis ining makaon kan mga natatadang debris na nakapalibot sa planeta.
Paliwanag kan mga eksperto, an halangkaw na density kan white dwarf, nagresulta kan padagos na pagbangga kan helium atoms sa sodium atoms, kaya nagbago an nahihiling na liwanag kaini sa spectrum.
Imbes na karaniwang kahel o puti, na-absorb kan mga atoms an mga kulay yellow asin pula mantang nagluluwas naman ini nin berdeng liwanag na bihirang mahiling sa mga bituon.
An makasaysayang pagkaka-diskubre kaini, an naisurat sa journal na RAS Techniques and Instruments, na nagpapatotoo na an kabilugan kan universe, napapano nin mga kakaibang elemento na maikukumparar sa science fiction.
