LEGAZPI CITY-Pinatawan nin mga sanction kan Amerika an President kan International Criminal Court (ICC) na si Tomoko Akane kaiba si Abdoulaye Seye, na iyo an senior trial attorney sa grupo nin prosekusyon.
Sinda an naghahagad nin mandamiento de aresto para kay Israeli Prime Minister Benjamin Netanyahu asin nominado para sa eleksyon bilang sarong judge kan ICC.
Kinumpirmar ini kan U.S Secretary of State Marco Rubio sa sarong pahayag na epektibo an executive order ni U.S. President Donald Trump kan nakaaging taon na nag-aawtorisa kan pagpataw nin mga sanction laban sa korte.
Pigpaliwanag ni Rubio an pagpataw nin mga sanction ki Akane asin Seye. Sinabi niya na an duwa direktang nakisumaro sa mga paghihingoa kan ICC na imbestigaran, arestaron, ikulong, o kasuhan an mga opisyales na an mga gobierno dai uyon sa hurisdiksyon kan ICC.
Kinondena kan tribunal an lakdang kan Estados Unidos asin sinabi na kun an mga representante kan tribunal pigtatakot huli sa pagpaotob kan ley, an internasyonal na legal na orden mismo an namemeligro.
Nagpaluwas na an US Treasury nagpaluwas nin general license kan Martes na nag-aawtorisa kan “wind-down” o luway-luway na pagtapos kan mga transaksyon na may relasyon kina Akane asin Seye sagkod Setyembre 17.
