Nangapudan nin tabang an Philippine Coast Guard (PCG) sa publiko para sa impormasyon na makakatabang sa paghahanap kan sarong 80-anyos na lalaki na nawawara makalihis maglunad sa ferry hali sa Batangas pasiring sa Oriental Mindoro.
Binisto kan Coast Guard an nawawarang pasahero na si Petronilo “Nilo” Mendiola Aranda, 80-anyos, asin residente kan Barangay Loob, Mataas na Kahoy, Batangas.
Segun sa ahensya, nakumpirmar kan Coast Guard Sub-Station Batangas City na kaibanan si Aranda sa passenger manifest kan MV FastCat M19, na naghali sa Batangas Port pasiring sa Calapan City, Oriental Mindoro kan Hulyo 29.
Huri siyang nahiling na nakasulog nin itom na Hollister cap, abong polo shirt, asul na maong, asin itom na sapatos.
Padagos na nakikipag koordinar an Coast Guard sa mga lokal na otoridad asin iba pang ahensya de gobierno ngani na maaraman an lokasyon kan senior citizen asin matawan nin tabang an saiyang pamilya.
Nangapudan man an PCG sa siisay man na may impormasyon dapit ki Aranda na tulos na makipag koordinar sa pinakaharaning Coast Guard station o sa mga lokal na otoridad.
