LEGAZPI CITY-Sinangatan kan patong-patong na kaso sa Office of the Ombudsman si dating Ako Bicol Representative Zaldy Co asin iba pang opisyal na sina Uswag Ilonggo Representative Jojo Ang Jr, negosyanteng si Alfonso Tan, siring man an mga opisyal kan Sunwest Inc., International Builders Corp., J.E. Tico Construction Company, Allencon Development Corp., asin A.M. Oreta & Company.
An limang magkakahiwalay na reklamo isinangat kan Amlig Antique Alliance, sarong coalition kan mga environmental advocate, katakod kan suboot katiwalian asin mga proyektong sinasabing nagkawsa nin danyos sa kalikasan sa Antique.
Kaiba man sa mga inireklamo an mga dati asin presenteng opisyal kan Department of Public Works and Highways (DPWH) Region VI, DPWH Antique District Engineering Office, asin an Department of Environment and Natural Resources–Environmental Management Bureau Region VI.
Susog sa Amlig Antique Alliance, an mga proyektong ipinaotob poon kan taong 2019 hasta 2025, nagbayolar suboot sa environmental laws asin procurement rules.
Nagpahayag man nin suporta an Kahublagan Kontra Kurapsyon (KKK) asin iba pang mga advocate sa Panay, na nagsabing an pagsasangat kan reklamo, iyo an yugto kan saro sa pinakadakulang citizen-led anti-corruption asinenvironmental accountability campaign sa Western Visayas.
Dagdag pa kan grupo, naghahanda pa sinda nin panibagong mga reklamo na masakop sa 91 government contracts na nagkakantidad nin labi P7.3 bilyon poon 2017 hasta 2025.
Marurumduman na enot nang sinabi ni Ramil Martinez, communications coordinator kan Amlig Antique Alliance, na nagkawsa nin danyos sa kalikasan an serye nin mga proyekto kan Sunwest Inc. na pagmamay-ari ni Zaldy Co.
Nagpasiring man sa saindang tanggapan an mga indigenous people dara an mga ladawan asin video kan mga naguguhong kabuludan, orog na tuyong igwang bagyo sa lugar, na pigkokonsidera nindang bunga kan nabanggit na mga proyekto sa lalawigan.
