LEGAZPI CITY-Nagtitinir sa Quezon City Jail-Male Dormitory si Senador Rodante Marcoleta makalihis na arestaron sa kasong pandarambong na warang piyansa katakod kan suboot pagresibe nin P75 million na donasyon sa kampanya.
Enot nang pigsugo kan Sandiganbayan an paglipat ki Marcoleta makalihis na makapasar ini sa independienteng medical examination kan University of the Philippines-Philippine General Hospital asin ideklarar na wara ining pneumonia o anumang impeksyon sa saiyang baga.
Magigirumduman na hinagad kan kampo ni Marcoleta na magtenir siya sa ospital kan PNP huli sa mga kondisyon na posibleng may relasyon sa pneumonia asin iba pang helang kan mambabatas.
An mga kaibang akusado ni Marcoleta na si dating kongresista Mike Defensor, negosyanteng si Joseph Espiritu, asin Aristotle Viray, parehong nagsangat nin not guilty plea. Dai man nagsangat si Marcoleta huli ta pendiente pa an saiyang mosyon na ibasura an saiyang kaso.
Apwera sa kasong plunder, nahahampang man an mga akusado sa kasong pagbalgar sa Presidential Decree 46, na nagbabawal sa mga opisyales kan gobyerno na mag-resibe nin regalo o anuman na benepisyo huli sa saindang posisyon.
Nakakua man nin probable cause an Sandiganbayan sa kasong ini laban ki Marcoleta asin Defensor.
Mientras tanto, an korte nag-iskedyul kan arraignment para ki Espiritu asin Marcoleta sa Hulyo 22.
