LEGAZPI CITY-Nagpatanid an Iran na saindang hihigotan an pag ulang sa mga pangenot na ruta na pig-aagihan kan mga energy exports sa Middle East makalihis na liwat ipaotob kan Estados Unidos an naval blockade sa mga pantalan kaini asin malunsar nin panibagong serye nin pag-atake harani sa Strait of Hormuz.
Nagpatanid man an Islamic Revolutionary Guard Corps (IRGC), na saindang isasarado an iba pang ruta na piggagamit sa pagluwas kan langis asin iba pang suplay kan enerhiya na pinakikinabangan kan U.S.
Mientras tanto, sinabi kan U.S. military na nagsasagibo ini nin pitong oras na airstrike sa palibot kan Strait of Hormuz asin sa mga baybayon na parte kan Iran.
Inakusaran man kan Amerika an Iran na responsable sa pag-atake sa pitong commercial ships kaini kan nakaaging semana na nagresulta sa pagkagadan asin pagka irido kan nagkapirang mga tripulante.
Nagpatanid man an Iran na posible kaining gamiton an mga kaalyado kaining Houthi rebels sa Yemen ngani pugulan an pag-agi kan mga barko sa Bab el-Mandeb, saro sa importanteng ruta na pig-aagihan nin langis asin iba pang kalakal na nagdudugtong sa Red Sea asin Gulf of Aden.
Naenot nang nagpatanid an sarong halangkaw na opisyal kan Houthi na posible nindang isarado an Bab el-Mandeb kun magpapadagos an mga pag-atake kan Saudi Arabia sa Yemen.
Dai man nagpadaog si U.S. President Donald Trump asin sinabing tatargeton niya an mga pasilidad kan enerhiya, power plants, asin mga tulay sa Iran kun padagos ining magmamatigas na buksan an saindang nuclear program.
