LEGAZPI CITY—Ipigdoon kan grupo nin mga parasisira na mantang nanggana an Pilipinas sa arbitral award kan taong 2016, an nagpalyar man liwat suboot an nacion na maipaotob ini para sa pakinabang asin interes kan namamanwaang Pilipino.
Segun ki Pambansang Lakas ng Kilusang Mamamalakaya ng Pilipinas (Pamalakaya) President Pando Hicap, sa intrevista kan Bombo Radyo Legazpi, na bako pa malaya an mga parasisira na magpasiring asin maglawod sa West Philippine Sea sa laog kan sampulong taon, urog nang nai-report kan mga parasisira kan 2021 na 70% an nawawara sa saindang dakop nin mga sira na nagpapadagos hasta ngunyan magin man an pagsabat sainda kan mga Chinese coast guards mantang nasa 10-20 nautical miles na rayo pa sana ninda sa Scarborough shoal.
Dugang niya na dae na man nakakatabang an paagi ni Presidente Ferdinand Marcos Jr. siring kan pig-orgulyo kaining mga Balikatan exercise sa WPS nganing mapundo an pangha-harass kan Chinese coast guards sa mga lokal na parasisira.
Dae man suboot naresolbaran an problema kan padagos na pangha-harass o panggigipit kan law enforcement agencies kan China sa mga parasisira asin an pagkakait sa mga tradisyunal na pasiraan sa WPS.
Punto pa ni Hicap na durante man kan paglansar nin Balikatan exercise kan Pilipinas asin Estados Unidos kun sain pigbawal an pagsira an wara man na nareresibeng tabang an mga apektadong parasisira alagad kun igwa man an kakarampot an saindang nakukua.
Afuera digdi, sinabi man kan opisyal na kinakaipuhan an matoninong na paagi siring kan pag-oolay asin dae mag-abot sa giyera an isyu mapadapit sa mga report hale sa scholars sa China na nagsasabing ang Batanes an parte kan sarong natural geographical extension kan Taiwan.
Mientrastanto, tinawan-doon man ni Hicap na dapat interes kan mga parasisira an enoton kan gobierno kan Pilipinas asin bako an Estados Unidos.
