LEGAZPI CITY-Pighagad kan mga pamilya kan mga biktima kan giyera kontra droga ni dating Presidente Rodrigo Duterte sa Korte Suprema (SC) na ideklarar na bakong konstitusyonal an mga polisiya na nagin basehan kan dating administrasyon.
Sa paagi kan saindang mga abogado hale sa CenterLaw Philippines, an mga petisyonaryo nagsangat nin Manifestation asin Urgent Motion for Resolution na naghahagad sa Korte Suprema na aksyunan an mga kaso na nakabinbin poon pa kan 2017.
Sakop kan petisyon an 26 na komunidad sa Manila na suboot nakaeksperyensya nin harassment sa kasagsagan kan war on drugs.
Huli sa seguridad, dai na nginaranan an mga lugar na pinag-oolayan.
Pighahagad ninda sa Korte Suprema na ideklarar na bakong konstitusyonal an Philippine National Police Command Memorandum Circular 16-2016, na mas midbid sa apod na “Project Double Barrel,” na nagserbing basehan kan mga operasyon kontra droga.
Nagtetenir an polisiya, kaya pwedisir pa ining gamiton kan mga pulis bilang basehan kan mga operasyon sa mga pobreng komunidad.
Katakod kaini, naghahagad man nin writ of amparo an mga pamilya. Sinabi ninda na an nagkapirang pamilya kan mga biktima kan gerra kontra droga nakakaeksperyensya pa nin mga banta, pananakot, asin salang impormasyon.
Marurumduman na kan Marso 2025, inaresto si dating Presidente Rodrigo Duterte sa sarong mandamiento hale sa International Criminal Court na may koneksyon sa sarong kaso nin crimes against humanity asin dinara siya sa The Hague sa Netherlands tngani atubangon an paglilitis.
