LEGAZPI CITY—Arestado an sarong drug personality asin nakumpiskar an mga ilegal na droga sa ginibong interdiction operation kan mga otoridad sa Matnog Port sa Barangay Caloocan, Matnog, Sorsogon.
Binisto an naarestar na indibidwal na si alyas “Rey”, 33-anyos, warang agom, driver asin residente kan Phase 2, Barangay H2, Dasmariñas, Cavite.
Nakumpiskar saiya an nasa 20 gramos nin pigtutubudang shabu na may standard value nin P136,000. Narekober man saiya an duwang transparent glass tubes na may laog nin pigtutubudang drug residue asin sarong orange na sling bag na ginamit sa pagtago nin kontrabando.
Pinangenotan an operasyon kan Philippine Drug Enforcement Agency Seaport Interdiction Unit (SIU) Matnog, PDEA Regional Office 5 K9 Unit, Philippine Ports Authority Matnog, Matnog Municipal Police Station, Philippine Coast Guard Matnog Substation K9 Team, asin Philippine National Police Maritime Group.
Mientrastanto, nahahampang an nasabing persona sa pagbalgar sa Section 11 (Possession of Dangerous Drugs) asin Section 12 (Possession of Drug Paraphernalia) kan Republic Act No. 9165 o Comprehensive Dangerous Drugs Act of 2002.
