LEGAZPI CITY-Inilansar ni President Ferdinand Marcos Jr. an sarong bagong digital na plataporma na may katuyuhan na gibohon na mas bukas, madaling maabot, asin igwang paninimbagan sa publiko an gabos na paggastos kan gobierno.
An bagong sistema inaapod na Centralized Open Monitoring Platform for Appropriations and Spending Statistics o DBM COMPASS, na isinagibo kan Department of Budget and Management (DBM).
Kasabay kaini, pinangenotan man kanPresidente an pag-aprobar kan updated na Philippine Public Financial Management Reform Roadmap 2024–2028 ngani mapakusog an financial management kan nacion.
Segun ki Presidente Marcos, an kwarta kan banwaan para sa banwaan, kaya direchos kan lambang Pilipino na mahiling asin masubaybayan kun saen napapaduman an saindang pinagpagalan na buwis.
Sa paagi kan DBM COMPASS, magkakaigwa an publiko nin online portal na igwa nin mga interactive charts ngani madaling mahanap an mga budget, obligasyon, asin aktwal na kwarta na pinaluwas kan lambang ahensya asin rehiyon.
Sinabi kan Hepe Ehekutibo na an marhay na pagmanehar kan pondo, igwa nin direktang epekto sa marikas na pagtugdok nin mga eskwelahan, mas marhay na mga ospital, pagtabang sa mga paraooma asin mga parasisira, asin an pag-implementar kan mga proyekto maski sa hararayong lugar.
Tinawan doon ni Marcos na pinahiwas man kan gobierno an Project DIME, na naggagamit nin mga satellite sa pag-monitor kan imprastraktura kan nacion.
Ipigsugo man kan Presidente an gabos na ahensya kan gobierno na i-align an saindang budget sa mga pangenot na prayoridad kan nacioon asin pakarhayon an saindang pag-report asin pag-monitor kan mga proyekto.
Pigduon kaini na ngani mamantinir an pagtubod kan mga tawo, bakog bastante na tama sana sa papel an budget alagad kaipuhan na mamatean man kan mga namamanwaan.
