Ipigbuyagyag sa korte kan sarong testigo asin dating Department of Public Works and Highways (DPWH) Bulacan District Engineer Henry Alcantara na uminabot suboot sa P90 million ‘kickback’ fee an saindang natipon para ki dating senator Ramon “Bong” Revilla Jr. katakod kan flood control project sa Bulacan.
Sinabi pa kan dating DPWH District Engineer na pigsugo siya kan saiyang dating boss na si dating Public Works Undersecretary Roberto Bernardo na mangolekta kan nasabing kantidad hali sa mga contractor.
Segun ki Alcantara na kinuwa an kwarta hali sa advance payments kan mga contractor asin ipinadara sa sarong hotel sa Roxas Boulevard sa paagi kan saiyang driver.
Paliwanag kaini na an P90 million an ipiglaag sa apat hanggang limang bank boxes na laog an tig-P20 million lambang saro.
Alagad lininaw kan sarong testigo na dae niya marumduman kun direktang pigresibe ni Revilla an bilog na kantidad kan kwarta.
Segun pa ki Alcantara na siya an nagpirma sa mga dokumentong nag-autorisa sa bayad para sa P92.8 million na flood control project sa Pandi, Bulacan, maski bako siya mismo an nagsagibo nin inspeksyon sa proyekto.
Naglaom sana suboot siya sa mga report saiya kan mga subordinates na nagtaram na nagin matanos an proyekto.
Kalakip suboot kaini an mga ladawan na ipinahiling saiya bilang patunay na tapos na an saindang trabaho, kaya napiritan siyang pumirma sa mga dokumento.
