LEGAZPI CITY-Kinondena kan grupo nin mga paratukdo an nangyaring insidente nin pambabadil sa laog mismo kan San Jose National High School sa Tacloban City.
Nangapudan man sinda na dagdagan an lakdang asin seguridad sa mga eskwelahan siring kan X-ray scanner o metal detector huli na nahahandal sinda sa posibleng epekto kaini sa mga estudyante magin sa mga paratukdo.
Segun kay Allianced of Concerned Teachers President Ruby Ana Bernardo, sa intrevista kan Bombo Radyo Legazpi na nagpapaabot sinda nin simpatya sa mga paratukdo asin estudyante sa bilog na school community sa Tacloban.
Sinabi pa ni Bernardo, na nakakahadit ini para sa mga paratukdo orog na nasa laog mismo kan eskwelahan an insidente na dapat kuta nang safe alagad yaon an “culture of violence”.
Nangangapudan man sinda sa gobierno partikular na sa DepEd na kaipuhan nin suporta kan sektor pagabot sa psychological support orog na sa mga estudyante asin madagdagan an mga security asin mental health personnel sa mga eskwelahan.
Tinawan doon man niya na bako na ini bago, orog na sa nangyari kan nakaagi sa Cavite asin sa mga nakalihis na taon.
Enot nang nai-report kan EDCOM 2 na nagko-kontribwir sa bullying, intimidation, asin harassment an over crowded na mga classroom kun sain dai na matutukan kan mga paratukdo an mga estudyante sa tahaw kan saindang kadakol na gibo.
Huli digdi, dai suboot natututukan an hollistic approach sa mga estuydante ngani mapunan an saindang individual differences.
Alagad nagkukulang pa sa ngonian an mga mental health personnel sa nacion kun sain dai maabot sa 2,000 pa sana an lisensyado sa Pilipinas.
Dugang pa kan opisyal na kinakaipuhan sa ngonian an suporta sa sektor asin matutukan an learning environment kan mga estudyante sa laog kan eskwelahan.
