Nilinaw ni House lead prosecutor Atty. Gerville Luistro na warang dokumentaryong ebidensiya an hinali sa impeachment case kontra ki Vice President Sara Duterte sa pre-trial proceedings sa Senado.
Segun ki Luistro na bako sakop kan pre-trial conference an pagdedesisyon kun aakuon o dae an mga dokumentaryong ebidensiya.
Tutukaron sana ini kun pormal nang magpuon an impeachment trial.
Nagsayuma man ini na magtao nin detalye dapit sa mga ebidensya, testigo, asin iba pang isyu na pinag-oolayan sa pre-trial ngani na dae maapektaran an kaso.
Ipinagsaladawan ni Luistro na masigla alagad propesyunal an dalagan kan pre-trial conference, kun sain parehong nakatuon an prosekusyon asin depensa sa pagpapatibay kan saindang lado.
Nakatalaan na magpuon an impeachment trial ni Duterte sa Hulyo 6.
