Dakol na suboot an nakulong asin nakasuhan puon kan nabuyagyag an mahewasang korapsyon sa flood control asin iba pang public infrastructure project sa bilog na nacion.
Segun ki Department of Public Works and Highways (DPWH) Sec. Vince Dizon, nasasabutan kan administrasyon ang dagit kan publiko sa mga nabuyagyag na mahewasang korapsyon alagad kaipuhan magin maingat an gobierno sa pagsunad nin kaso laban sa mga imbuelto.
Sa katunayan suboot nag-abot na sa 30 indibidwal an nakakulong asin nakasuhan puon kan 2025 State of the Nation Address (SONA) ni Presidente Ferdinand Marcos Jr. na hudyat kan pagpupuon kan mga serye kan imbestigasyon.
An mga ini, segun ki Sec. Dizon, an bako simpleng mga personalidad kundi mga mambabatas, DPWH officials, District engineers, contractors asin mgin an dating kalihim na itinalaga ni Presidente Marcos na si Sec. Manny Bonoan.
Bako madali an pagsagibo kan case build-up asin serye kan imbestigasyon, kaya pigsierto kan administrasyon na dae basta mababasura an mga pigsusunad na kaso laban sa mga sangkot sa korapsyon.
Nanindugan si Dizon na bako small fish an mga nakulong huli sa nabunyag na iskandalo siring kan mag-agom na Curlee asin Sara Discaya, Sen. Jinggoy Estrada, asin dating Sen. Ramon Revilla, sa ibong pa kan puna kan mga kritiko kan presenteng administrasyon.
Segun ki Dizon, nagtitinir an pokus ng DPWH sa pagsusuri sa gabos kan mga proyektong nababalot sa korapsyon asin dae nilingawan sa paglipas ng panahon.
Nagpromesa an kalihim na mas dakol pang indibidwal ang makukulong asin makakasuhan huli sa nabunyag na korapsyon, mantang nagpapadagos an case build-up at referral sa Office of the Ombudsman.
