Pupuunan na kan gobierno an pagtitindog nin sadiring strategic petroleum stockpile sa Pilipinas makalihis maapektaran an suplay asin presyo kan langis huli sa tensyon sa Middle East.
Segun ki Energy Secretary Sharon Garin, an nasabing kariribukan an nagpahiling nin pangangaipo para sa mas pusog na energy security sa nacion, na naglalaom sa imported na langis.
Sa irarom kan plano, ititindog an mga pasilidad kan Philippine National Oil Company (PNOC) ngani na mag-imbak nin reserbang langis na malagpas sa presenteng imbentaryo kan mga pribadong kumpanya.
Obheto kaini na makapagtao nin dugang na buffer sa suplay kan nacion sa panahon kan krisis.
Pigkakarkulong maabot sa 500,000 barrels an enot na stockpile na igwang poco mas o menos P5 billion na kantidad, kaibanan an pagtitindog nin mga tangke, pipeline, pantalan, asin iba pang pasilidad.
Segun sa DOE na nakikipag koordinar na an gobierno sa Philippine National Oil Company asin Maharlika Investment Corp. ngani na matapos an kasunduan sa laog nin duwang bulan, kasunod an feasibility study asin site evaluation.
Plano man kan gobierno na padakulaon an reserba ngani na madugangan an presenteng 30 aldaw hasta 60 aldaw na imbentaryo kan mga pribadong kumpanya, asin magdugang nin poco mas o menos 30 aldaw na buffer stock.
