LEGAZPI CITY—Pinaglalaoman na makakaeksperyensya an nagkapirang lugar sa nacion nin mapanganuron na kalangitan na may kalat-kalat na pag-uuran, magin pagkikilat asin pagdagoldol hasta sa Miyerkoles, dara kan southwest monsoon o habagat.
Segun ki Weather Specialist Christian Allen Torrevillas, sa intrevista kan Bombo Radyo Legazpi, an habagat iyo an gikan sa southwesternly winds na sarong mainit asin humid na nagkakawsa man liwat nin mainit na panahon alagad may tsansa man nin thunderstorms urog na pag-abot nin hapon asin banggi.
Dugang ni Torrevillas, na siring kaining mga bulan an igwa nin posibilidad na magkaigwa nin bagyo alagad kalimitan sa mga track kaini an dae man nagla-landfall sa kadagaan kan Pilipinas, alagad nagrarani sana ini sa Philippine Area of Responsibility.
Piglalaoman man na mapuon an El Niño ngunyan na bulan kan Hunyo o sa Hulyo.
Mensahe man kan opisyal sa publiko na magtinir na naka-monitor sa state weather bureau asin iba pang ahensya kan gobierno mapadapit sa issuances siring kan thunderstorms advisories.
