LEGAZPI CITY-Naglansar an Department of Education (DepEd) nin nationwide Oplan Balik Eskwela bilang paghanda sa pagbukas kan School Year 2026-2027 sa Hunyo 8, 2026.
Segun kay Education Secretary Sonny Angara, ipapaotob an Oplan Balik Eskwela poon Hunyo 1 sagkod Hunyo 11 ngani na masierto an marhay na pagbubukas kan klase sa bilog na nacion.
Katuyuhan kan programa na mapakaskas an proseso kan enrollment, masimbagan an mga concerns kan publiko, asin masierto na preparado na an mga eskwelahan para sa bagong school year.
Maabot sa 16 na ahensya kan gobierno asin utility partners an mapartisipar sa preparasyon para sa pagbubukas kan klase.
Kabali digdi an Department of the Interior and Local Government (DILG), Philippine National Police (PNP), Department of Health (DOH), asin Metropolitan Manila Development Authority (MMDA) na iyo an mamumuno kan implementasyon kan mga lakdang sa kaligtasan, salud, asin traffic management sa mga eskwelahan.
Ngani mas mapadali an pagsimbag sa mga pigkakahaditan kan mga magurang asin mga estudyante, ma-operate man an Oplan Balik Eskwela Public Assistance Command Center sa paagi nin mga hotline, text messaging, email, asin social media platforms hale sa central, regional, division, hasta sa school levels.
Sa ibong na lado, nangapudan an DepEd sa publiko na magkooperar ngani na magin malinaw asin salbado an pagbubukas kan klase ngonian na taon.
