LEGAZPI CITY-Inanunsyo kan Trump administration an sarong mayor na pagbabago sa polisiya sa imigrasyon kan Estados Unidos ngonian na katapusan kan semana.
Sa irarom kan bagong patakaran, an mga indibidwal na may temporaryong visa na gustong mag-apply para sa green card, dapat muna na magbalik sa saindang sadiring nacion ngani mag-agi nin consular processing.
Bako arog kan dati na an mga aplikante pigtutugutan na mag-file para sa pag-adjust kan estado mantang yaon sa U.S., orog na an mga agom kan mga U.S. citizens asin an saindang mga aki.
Sa irarom kan bagong sistema, an mga aplikasyon maagi na sa mga embahada o konsulado kan Estados Unidos sa ibang nacion.
Pigkakarkulong labi sa sarong milyon na mga aplikante na presenteng naghahalat kan saindang green card an maaapektaran kan nasabing bagong patakaran.
Susog sa U.S. Citizenship and Immigration Services (USCIS), sa solamenteng sa “pambihirang mga sirkumstansya” sana o kun igwa nin importanteng benepisyo sa ekonomiya sa Estados Unidos an adjustment kan estado sa laog kan nacion.
Kinontra man kan nagkapirang mga immigrant advocates asin mambabatas an nabanggit na lakdang, huli ta posible ining magresulta sa family separation asin dagdag na abala sa mga aplikante.
Sa kabilogan, obheto kan bagong polisiya na higotan an proseso nin permanent residency asin baguhon an haloy nang sistema kan imigrasyon kan Amerika.
