LEGAZPI CITY—Padagos an mahigot na pagbabantay kan kapulisan kan Albay sa mga evacuation centers asin border control points sa tahaw kan nagpapadagos na aktibidad kan bulkang Mayon.
Segun ki Albay Police Provincial Office Provincial Director Police Colonel Noel Nuñez, sa intrevista kan Bombo Radyo Legazpi, mahigot ninda ining pigbabantayan 24/7 urog na an sa laog kan 6-kilometer permanent danger zone.
Nasa 400 na personahes ninda an naka-deploy sa gabos na border control points sa provincia.
Basado man sa saindang datos na wara pa man sindang narespondehan na mga major incidents puon kan nagtinir an mga apektadong residentes sa saindang evacuation center, siring man na wara man sindang nairehistro na insidente na may kinaaraman sa paz y orden sa komunidad.
Inobligar man suboot ninda na pirming may dara nin tubig an mga nagbabantay sa mga border control points; asin pig-asigurar man kan saindang medical team na nagpapasiring sa border control points na pighihiling an saindang salud, huli kan namamateang mainit na panahon.
Siring man na pigsierto ninda na marerespondehan an mga residenteng nakakamati nin high blood pressure asin iba pang may comorbidity.
Pagiromdom man ni Nuñez sa mga residenteng nagtitinir sa evacuation centers na padagos na makipagkoordinar asin magsunod sa kapulisan para sa saindang kaligtasan; mensahe man kaini sa kapulisan na imantinir an saindang health condition nganing magpadagos man sinda sa paghahatod nin serbisyo publiko.
