Nag-abot na sa Islamabad, Pakistan an delegasyon kan Iran antes an importanteng negosasyon sa Estados Unidos na gigibuhon manungod sa ceasefire na pinagkasunduan kan duwang nasyon ngonian na semana.
Piglalaoman na makikipag-olay ki US Vice President Vance, special envoy Steve Witkoff, asin manugang na lalaki ni US President Donald Trump na si Jared Kushner an delegasyon kan Iran saagang aga para sa mga orolay na pupunan kan Pakistan nganing tapuson an gera.
Nagmamawot an duwang lado na makabilog nin sarong halawig na kasunduan nganing dagos nang matapos an iriwal.
An negosasyon an mangyayari wara pang sarong semana makalihis magtugot an Estados Unidos na punduhon an mga operasyon militar sa laog nin duwang semana karibay kan pagbukas liwat kan Iran kan Strait of Hormuz.
An mga kaparehong orolay na dati nang ginibo sa paagi kan Oman, alagad dai nagin matrayumpo huli sa mga dai pagkakasundo sa nuclear program kan Iran.
Haloy nang pigdoon kan Estados Unidos na dai dapat tugutan an Iran na magpayaman nin uranium o magkaigwa nin nuclear weapon, sarong bagay na habo tugutan kan Iran.
An duwang semanang tigil-putukan na pig-anunsyo ni Trump kan Martes an namemeligro na maraot makalihis an padagos na pambobomba kan Israel sa mga target kan Hezbollah na suportado kan Iran sa Lebanon.
Enot kaini, nagpatanid si parliament speaker Mohammad Baqer Qalibafna kan Iran na wara nin negosasyon sa Estados Unidos na mangyayari kun an mga pag-atake sa Lebanon an dai mapundo asin kun dai ibabalik an mga nakumpiskar na mga pagsadiri kan Iran.
Inakusaran man niya an U.S. na nagbalgar kan 10-point peace proposal.
