Bukas sa posibleng diplomatikong pag-oolay si Iranian President Masoud Pezeshkian sa Estados Unidos mapadapit sa inapod niyang “path of confrontation is more costly and futile than ever before.”
Ginibo kan opisyal an pahayag pirang oras antes nagtao nin pahayag si U.S. President Donald Trump manungod sa sitwasyon kan gera sa Iran, na inapod niyang “important update.”
Dati nang pig-anunsyo ni Trump na naghagad suboot nin ceasefire an Iran, na tulos na pignegaran ni Iran’s Ministry of Foreign Affairs Spokesman, Esmaeil Baghaei.
Sa surat na pinaluwas kan Iran na may labi 1,000 words, pinag-olayan ni Pezeshkian an kasaysayan kan Iran sa paghampang sa mga pagsalakay asin mga iriwal, asin ipigdoon na an Iran an dai nuarin man nagpoon nin gera.
Pigduon man kaini an importansya kan dayalogo kan duwang nasyon, na dakula an epekto sa masunod na henerasyon.
Lininaw man ni Pezeshkian na wara sindang raot nin boot sa ibang nasyon kabali na an Amerika, Europa, o mga kataraid na nasyon.
Dai pa malinaw kun an surat an nagrerepresentar sa bilog na gobyerno kan Iran, nin huli ta an Supreme Leader kan nasyon iyo an may pinal na desisyon sa mga mayor na isyu, kabali an negosasyon sa Washington.
Nagdakula man an impluwensya kan Islamic Revolutionary Guards Corps sa mga desisyon sa gera.
Sa bagay na ini, handa suboot si Pezeshkian na makipag-olay sa Supreme Leader asin sa Islamic Revolutionary Guards Corps manungod sa pagigin bukas kan Iran sa pagtapos kan gera kun masyerto an permanenteng tigil-putukan.
Idinepensa man ni Pezeshkian an mga retaliatory strikes kan Iran laban sa Israel asin iba pang mga nasyon sa Persian Gulf an bilang simbag sana sa ginibo sainda, sa ibong lan dai niya pinag-olayan an pagbukas kan Strait of Hormuz, na nagkawsa nin kariribokan pagkatapos na harangon kan Iran.
