LEGAZPI CITY – Ipiglatag na kan Legazpi City Police Station an saindang mga lakdang sa pagpapa-otob kan pazy orden sa kasagsagan kan Holy week.
Segun ki Legazpi City Police Station Officer-in-Charge Police Lieutenant Colonel Arthur Tagtag sa intrevista kan Bombo Radyo Legazpi na nakapagdeploy na sinda nin kapulisan sa 9 na simbahan sa ciudad huli sa pig-aantisiparang pagruso kan mga mananampalataya.
Padagos man an saindang koordinasyon sa lokal na gobierno para sa pagkokondusir nin mga road closures nganing dae magkaigwa nin gubot nin trapiko enkaso magsagibo na nin prusisyon an mga simbahan.
Ibinandera na man ninda an full alert status sa enterong durasyon kan Semana Santa asin nakahanda an mga police personnel gikan sa Albay Police Provincial Office asin Police Regional Office 5 bilang kadugangang tabang sa pagpapa-otob kan seguridad sa ciudad.
Afuera sa mga simbahan, pigsyerto man kan opisyal na may mga pulis na nakabantay sa mga malls, park, terminal, Mayon viewing site, asin mga karigusan nganing malikayan an dae piglalaoman na insidente.
Pagdoon man ni Tagtag na katabang ninda sa pagpapa-otob kan pazy orden ngonian na Holy week an manhamiento kan Bureau of Fire Protection asin Legazpi City Disaster Risk Reduction and Management Office.
