Nangapudan si Senador Francis “Kiko” Pangilinan nin mas mahiwas na interbensyon kan gobyerno nganing maprotehiran an mga paraoma asin parasira sa nagtitinding epekto kan paglangkaw kan presyo kan langis kawsa kan krisis sa Middle East.
Tinawan nin duon ni Pangilinan na an paglangkaw kan global oil prices an direktang nagtutulak pataas kan gastos sa transportasyon, abono, asin iba pang importanteng inputs sa agrikultura, na orog na nagpapadifisil sa saradit na paraoma asin parasira.
Namemeligro suboot an food security kan nasyon kun padagos na limitado an suporta para sa mga sektor na ini.
Sinabi ni Pangilinan na an pigtutukoy niya iyo an ₱2,325 one-time cash aid plan na para sana sa apat na milyon na paraoma sa pigkakarkulong 10 milyong rehistrado.
Sa sektor nin pagsira, mga 400,000 sana sa 2.4 milyong parasira an piglalaoman na makakaresibe nin tabang.
Katakod kaini, pigkakarkulong nasa 15,000 na parasira sana an makikinabang sa fuel assistance hali sa limitadong pondo kan gobyerno.
Segun ki Pangilinan, kulang pa an presenteng mga lakdang asin dapat na maglaag nin malinaw asin komprehensibong plano an Department of Agriculture (DA) ngani na maseguro an padagos asin abot-kayang produksyon nin kakanon.
Pigsuhestiyon man kaini an paggamit nin iba pang pondo arog kan quick response fund kan DA asin an calamity fund, kun kinakaipuhan, nganing madugangan an ayuda sa sektor.
Dati nang pigbusol ni Pangilinan an pagpahiwas kan fuel subsidies para sa mga paraoma asin parasira, siring man an temporaryong pagsuspinde kan fuel excise taxes ngani na maibsan an epekto kan paglangkaw kan presyo kan langis.
Kasabay kaini, pigbubusol man niya an mga reporma arog kan pagpakusog kan mga agricultural cooperatives, pagbalik kan mga agricultural extension services sa irarom kan gobyerno, asin pagmukna nin sarong komisyon na nakasentro sa agrikultura, pagsira, asin food security.
Sa tahaw kan nagtitinding krisis, tinawan duon ni Pangilinan na kinakaipuhan an tulos na aksyon ngani na masegurong dae mabugtak sa peligro an supply nin pagkakan kan nasyon.
