LEGAZPI CITY-Pangapudan kan sarong labor group an tulos na paglangkaw kan sahod na nasa P1,200 sa bilog na nacion huli sa padagos na epekto kan krisis sa mga obrero asin pamilyang Pilipino.
Segun ki Kilusang Mayo Uno Spokesperson Jerome Adonis, sa intrevista kan Bombo Radyo Legazpi na matindi an epekto kan padagos na paglangkaw kan produktong petrolyo asin dai matatanggi an pigsasabi kan gobierno na undercontrol pa asin warang oil crisis sa nacion.
Sinabi pa niya na namamatean na ini sa krisis sa presyo kan bagas, karne, gulayon, asin sira kun kaya importante na kalampagun an gobierno sa makatwirang mga pangapudan.
Kasabay kaini ikakasa ninda saaga, Marso 25, 2026 sa oras na alas 10:00 nin aga an pagmartsa bilang pangapudan na liwat na irehistro an living wage na nasa P1, 200 sa bilog na nacion.
Kabale ninda an mga obrero gikan sa manlain-lain na sektor sa irarom kan ‘all unity workers’, mga transport sector, urban poor, mga empleyado sa gobierno, mga patrukto, asin iba pa.
Tinawan doon pa ni Adonis na dai ninda pigaako an naratibo kan malakanyang na lifestyle change huli ta gigibuhong busabos suboot kaini an buhay kan mga obrero.
Agrangay man ninda an pagbasura sa oil deregulation law, halion an VAT sa petrolyo asin excise tax sa pagkakan, tubig, asin kuryente ngani mabawasan maski papano an gabat na naeeksperyensayahan kan mga obrero sa ngonian.
Dagdag pa kan opisyal na patong patong na pasakit ini sa mga obrero, tsuper, asin mga namamanwaan alagad dai nakakatabang asin selective sana an mga pigsasagibong lakdang kan gobierno.
Punto pa niya na mantang naghahaloy an gera sa Middle East, mas kadakol pang mga Pilipino an magugutom, mapuputulan nin tubig asin kuryente, asin posibleng magbawas nin empleyado an mga kumpanya dara kan pagtitipid.
