Pigduon ni Bicol Saro Party-list Rep. Terry Ridon na estriktong nakabase sa rules asin solidong ebidensya an proseso kan impeachment laban ki Bise Presidente Sara Duterte.
Segun ki Ridon, miembro kan House Committee on Justice, preparado an Kamara na depensaran an saindang proseso sa patas asin legal na paagi enkaso darahon ini kan kampo kan Bise Presidente sa Korte Suprema.
Pinahimutikan ni Ridon an mga alegasyon na base sana sa espekulasyon an mga reklamo.
Tinawan niya nin konkretong basehan arog kan report hale sa Commission on Audit (COA) dapit sa P70 milyon na disallowed confidential funds, siring man an Statement of Assets, Liabilities and Net Worth (SALN) ni Duterte.
Segun sa mambabatas, kinakaipuhan na ipaliwanag an agwat sa pigkakarkulong P30-P40 milyon na kabilugang sweldo kan Bise Presidente poon 2007 hasta 2024 kumpara sa pigbabaretang P88 milyon na net worth kaini kan 2025.
Pigsierto ni Ridon na sinunod an due process asin natawan nin pagkakataon an Bise Presidente na makasimbag sa lambang yugto kan hearing.
Nakatalaan an Komite na ipadagos an pagrepaso kan mga dokumento asin rekord nganing madeterminaran kun igwa nin supisyenteng “probable cause” nganing ipadagos an impeachment.
