LEGAZPI CITY-Pigkokunsiderar kan grupong PISTON na matrayumpo an duwang aldaw na tigil-pasada na ikinasa kan grupo nin mga transportasyon sa nagkapirang parte kan nacion.
Segun ki PISTON President Mody Floranda sa intrevista kan Bombo Radyo Legazpi na dakol na mga transport groups an nakapagpahayag kan saindang hinaing dapit sa kalbaryo kan mga namamanwaan huli sa padagos na paglangkaw kan presyo kan petrolyo.
Nagpatanid man an grupo sa padagos na paglalansar nin mga hiro protesta, bako sana sa National Capital Region kundi magin sa iba pang rehiyon.
Dae man pighahali an posibilidad na mautro pa an tigil-pasada na enot na ipiglansar kan Marso 19 asin 20, na nagin rason kan pagkaparalisa kan sektor kan transportasyon sa nagkapirang parte kan nacion.
Paliwanag kan opisyal na dakol na mga drivers an dismayado sa kawaran nin aksyon kan gobierno sa problema sa padagos na paglangkaw kan presyo kan produktong petrolyo.
Mientas tanto, napag-araman na igwang nakatalaan na meeting an PISTON kaibanan an grupo nin mga konduktor asin driver nin bus, kaibanan an mga taxi drivers, UV Express asin magin ang Transportation Network Vehicle Service ngani na mapag-olayan an saindang masunod na mga lakdang.
Pighihiling na ini an magigin hudyat kan masunod pang mga hiro-protesta sa lado kan transportasyon.
