Nagpromesa an mga manufacturer nin basic necessities at prime commodities (BNPCs) sa Department of Trade and Industry (DTI) na dae malangkaw an presyo sa laog nin masunod na 30 aldaw hasta 60 aldaw.
Kaibanan sa mga produkto na dae mahiro an presyo kan canned sardines, tinapay, instant noodles, kape, sabon, asin kandila ngani na maibsan an epekto kan paglangkaw kan presyo nin petrolyo.
Huli digdi, imamantenir kan 21 manufacturers an presenteng Suggested Retail Price (SRP) sa mga pangenot na babarakalon asin commodities.
Segun ki DTI Secretary Cristina Roque, obheto kaini na protehiran an mga parabakal mantang nagbabago an presyo kan produktong petrolyo.
Nagpatanid man an ahensya kontra sa hoarding asin paglangkaw kan presyo kaya inenganyar an publiko na mag report sa ahensya kan anuman na bayolasyon.
