LEGAZPI CITY-Naghahagad ngonian nin emergency powers an National Food Authority (NFA) ngani direktang maipabakal sa publiko an mas baratong bagas sa tahaw kan naglalangkaw na presyo.
Mawot kan ahensya na halion an mga “middlemen” asin direktang ipabakal sa merkado ngani maghababa an presyo kan bagas.
Obheto ninda na mapakaskas an pagbakal nin paroy sa mga lokal na paraoma asin an paggiling kaini.
Plano kan ahensya na ipabakal an bagas sa presyong ₱33 sagkod ₱36 kada kilo sa mga lokal na gobierno asin Kadiwa stores na pwedisir ipabakal sa publiko sa mas hababang presyo kaysa sa komersyal na bagas.
Sa irarom kan Rice Tariffication Law (RTL), limitado an poder kan NFA, kun saen sa presente, an NFA rice enot na ipinapabakal sa Food Terminal Inc. (FTI) o Local Government Units (LGUs) bago makaabot sa Kadiwa centers.
Huli ta pano na an mga bodega kan NFA, kaipuhan na magpaluwas nin mga lumang buffer stocks o aging rice ngani tawan nin lugar an mga bagong anihon nin paroy.
An lakdang bilang kasimbagan suboot sa padagos na paglangkaw kan presyo kan bagas, na uminabot na sa ₱52 sagkod sa labi ₱58 kada kilo sa nagkapirang lugar, asin bilang pag-andam sa epekto kan mahiwasang paglangkaw kan presyo kan langis.
Segun ki NFA Administrator Larry Lacson, kun maaprobaran an emergency power, mas makaskas na makakapag-intervene an ahensya sa merkado ngani na mabawasan an pagtios kan mga konsumidores.
