Nag-abot na sa labi tulong milyong Pilipino an nagparehistro sa Commission on Elections (Comelec) limang bulan makalihis liwat na magbukas an voter registration para sa Barangay and Sangguniang Kabataan Elections (BSKE).
Sa pinakahuring datos kan Marso 14, nasa kabilogang 3,137,948 na ang numero kan mga aplikanteng mawot na magpartisipar sa maabot na eleksyon.
Basado sa talaan kan poll body, mas dakol an numero kan mga kababaihan na nagsunad nin aplikasyon na nag-abot sa 1,633,469 kumpara sa 1,504,479 na kalalakihan.
Sa kabilogan na numero na ini, nasa 816,138 an mga bagong botanteng may edad 18 pataas, mantang 135,755 man an nag-apply para sa reactivation kan saindang status bilang regular na botante.
Para man sa SK polls, igwang 899,860 kajovenesang Pilipino na may edad na 15 hanggang 17 ang nagparehistro.
Pag-abot sa mga mga rehiyon, an CALABARZON an nakapagrehistro nin pinakahalangkaw na numero kan mga aplikante na sinundan kan Central Luzon asin National Capital Region.
Sa ibong na banda, an mga rehiyon kan Mimaropa, Caraga, Bangsamoro Autonomous Region in Muslim Mindanao (BARMM), asin Cordillera Administrative Region (CAR) an may pinakahibabang numero kan mga nagparehistro na dae naglagpas sa 100,000 kada saro.
Liwat na pinagiromdoman kan Comelec na an registration period an nagpuon kan Oktubre 20, 2025 asin mapadagos sagkod sa Mayo 18, 2026.
An nakatalaang aldaw kan eleksyon para sa BSKE an gigibohon sa Nobyembre 2 ngunyan na taon.
