Nagigibo ngunyan nin paagi an grupo nin mga manufacturers sa nacion ngani na mabawasan an epekto kan paglangkaw kan presyo nin petrolyo sa nacion.
Segun sa Supply Chain Management Association of the Philippines (SCMAP) na an paglangkaw kan presyo kan barakalon an huring lakdang na saindang gigibuhon.
Sinabi man ni SCMAP Marketing and Communications Director Henrik Batallones na habo muna ipataw an pasabin sa mga konsumidores enkasong maglangkaw sinda nin presyo kan barakalon.
Nagkapira sa mga posibleng gibuhon iyo an pagkuwa nin mas dakol na orders ngani na maghaloy an stocks asin dae magin madalas an pagbiyahe.
Napag-araman na nakatalaan man sindang kaolayon kan Department of Trade and Industry (DTI) para sa posibilidad na paglangkaw kan presyo kan pangenot na babarakalon.
