Dinara sa ospital an contractor na si Pacifico “Curlee” Discaya, saro sa mga personalidad na imbuelto sa flood control scandal, susog sa kumpirmasyon kan saiyang abogado ngonian na Huwebes.
Sa sarong pahayag sinabi kan abogado ni Discaya na si Cornelio Samaniego III na nakaka-eksperyensya nin manlaen-laeng kamatean an saiyang kliyente.
Kinumpirmar man ni Senate President Vicente ”Tito” Sotto III, na nagsairarom si Discaya sa MRI test huli sa frozen shoulder.
Segun ki Sotto, halipot sana an oras kan pagtinir ni Discaya sa ospital kaya naibalik man tulos ini sa detention facility kan Senado makalihis an pagsusuri.
Nakadetine si Discaya sa Senado puon pa kan Setyembre 2025 makalihis siyang ma-cite in contempt katakod kan imbestigasyon kan suboot anomalya sa flood control projects.
Si Discaya asin an saiyang agom na si Sarah Discaya an ipigdadawit sa pirang construction firms na may kapot na mga government contract, kabale an pirang flood control projects na pig-iimbestigaran huli sa suboot mga iregularidad.
Mientrastanto, nakadetine man si Sarah Discaya sa Lapu-Lapu City Jail.
