LEGAZPI CITY-Pigsierto ni Philippine Ambassador to Washington Jose Manuel Romualdez na dai papabayaan kan Estados Unidos an Pilipinas sa katahawan kan matinding agresyon kan China mapadapit sa isyu sa kadagatan kan West Philippine Sea.
Ini maski pa nagolay na sinda US President Donald Trump asin Chinese President Xi Jinping ngani resolberan an isyu sa kadagatan.
Segun kay Romualdez, magtetenir na matatag an Pilipinas sa pagtatanggol kaini sa soberanya, alagad bukas man an nacion na ayuson an relasyon sa China ngani mapahewas an kalakaran asin koneksyong pang-ekonomiya.
An Estados Unidos asin an Pilipinas an nangengenot sa pagtuligsa sa agresyon kan China, na nagagamit kan water cannon, flares, asin nag-uulang sa mga puwersang Pilipino sa kagadatan magin sa himpapawid.
Pigpapagirumduman man kan Estados Unidos na may obligasyon sindang ipagtanggol an Pilipinas sa armadong pag-atake.
Mantang pigkakahaditan an posibleng pagkakasundo kan Estados Unidos asin kan China, pigsierto kan Philippine Ambassador na papakusugon pa an mga koneksyon sa seguridad asin depensa kan nacion, orog na igwang pondo an Estados Unidos para sa modernisasyon kan mga militar.
Sa katahawan kan tensyon sa West Philippine Sea, obheto suboot kan nacion na mapamarhay an relasyon sa China, na may kinaaraman sa climate change, manufacturing, asin mga alternatibong enerhiya.
