LEGAZPI CITY—Nangapudan an nagkapirang residentes kan Barangay Anoling sa banwaan kan Camalig, Albay na maibalik na an suplay nin kuryente sainda makalihis na madamay an linya pasiring sa saindang lugar kan magpaotob nin power shutdown an Albay Electric Cooperative sa mga lugar na sakop kan 6 kilometer permanent danger zone kan Bulkang Mayon.
Segun ki Menchie Llantero residente kan Brgy. Anoling, kan nasabing banwaan, sa intrevista kan Bombo Radyo Legazpi, maabot sa 100 residentes an nangangaipuhan nin kuryente sa saindang barangay na kun sain nagpapadifisil ini sa sitwasyon urog na sa may mga aki, may senior citizens asin may persons with disability (PWD) na mga kaiba sa harong.
Dugang niya na bilang alternatibo an naggagamit na sana sinda nin gasera o kaya solar na kun minsan an dae man nagagamit huli sa dae ini nacha-charge huli ka mauran an panahon.
Segun saiya na mantang ipigdulok na man ninda an agrangay sa ALECO alagad hasta sa ngunyan wara pa sindang nareresibe nin anong feedback.
Afuera digdi, nagmamawot man sinda na matabangan urog na labi man na naapektaran an saindang mga pananom dara kan ashfall na gikan sa naunambitang bulkan.
