LEGAZPI CITY-Tinawan doon kan sarong Propesor na dapat maipadagos na an Barangay asin Sangguniang Kabataan Elections ngonian na taon.
Kasunod ini kan pirang beses na postponement kan nasabing eleksyon alagad ipapadagos suboot ini sa Nobyembre 2.
Segun kay Kontra Daya Convenor Professor Danilo Arao, intrevista kan Bombo Radyo Legazpi, na wara ng rason ngani dai pa ini maidagos asin magigin “unacceptable” ini mantang nagkakaigwa nin agam-agam an publiko.
Dagdag pa kan Propesor na nagluluwas na pigpapalawig sana kaini an termino kan mga BSKE Officials, na posibleng maging excuse man kan mga nasa local asin national level officials para sa saindang anom na taon na termino.
May kadifisilan suboot na sabihon kun maidadagos an BSKE ngonian na taon, kaya kinakaipuhan na magkaigwa nin kolektibong paghiro an kabataan asin iba pang sektor kan sosyedad.
Dapat man suboot na dai na pag-pugulan pa kan mga miembro kan kongreso asin dai na magkrear nin mga excuses ngani dai ini maipadagos.
Mantang nagasasagibo na nin lakdang an Commission on Election, pigeenganyar an mga kabataan na i-maximize an voter registration period ngani maipadagos na an Barangay asin Sangguniang Kabataan Elections.
Mientrastanto, mapoon an campaign period para sa BSKE sa Oktubre 22 sagkod Oktubre 31, asin pigeenganyar an mga kabataan na maging vigilante asin mapagbantay sa posibleng pandaraya sa kampanya siring kan vote buying, maling paggamit kan mga campaign materials, asin illegal assembly sa panahon kan kampanya.
