Nagpiyansa si dating Senador Ramon “Bong” Revilla Jr. nin P90,000 sa kasong graft na may kinaaraman sa P92.8 million na ghost flood control project sa Pandi, Bulacan.
An piyansa ni Revilla an para sana sa kaso nin graft sa Fourth Division Clerk of Court huli ta wara nin katampad na piyansa an saiyang malversation case.
Boot sabihon, dae man liwat papaluwason asin makakalaya si Revilla mantang nakabinbin pa sa anti-graft court an kasong malversation.
Sa presente, nakatenir si Revilla sa New Quezon City Jail sa Payatas, base sa commitment order na pinaluwas kan Sandiganbayan Third Division.
Nahahampang an dating Senador sa kasong graft asin malversation of public funds through falsification of public documents sa Sandiganbayan Fourth and Third Divisions.
An mga kasong isinangat kan Office of the Ombudsman makalihis an ginibong imbestigasyon sa pakikipagtabangan sa Department of Justice, kun sain may nahiling na probable cause na warang proyekto na nagibo sa ibong kan ideneklarang kompleto o natapos na.
