LEGAZPI CITY – Gadan an duwang indibidwal makalihis na mabagsakan nin darakulang tipak nin gapo an pigkakaturugang harong huli sa magdamlagang pag-uuran na dara ni Bagyong Ada sa Barangay Bariis, Matnog, Sorsogon.
Segun ki Matnog Municipal Police Station Acting Chief of Police, Police Captain Wilfred Berdin sa intrevista kan Bombo Radyo Legazpi na nangyari an insidente alas dose nin maagahon kan Enero 17 kun sain nasa kasagsagan nin pagkaturog kan makadangog an mga ini nin sarong kalabog.
Sa kagayunan suboot nakaluwas pa an lima sa mga ini alagad dae na nakaluwas an duwang biktima na binistong sinda Bryan Gaspi, 22-anyos na trabahador kan kagsadiri kan harong asin an pamangkin kaining si Trixie Mazon, 19-anyos.
Huli sa darakulang tipak nin gapo, kinaipuhanan pang gumamit nin mga backhoe nganing matanggal sana an mga debree asin marecover an hawak kan mga biktima na nagdurar nin haros limang oras.
Pigtaram pa kan opisyal na afuera sa nangyaring landslide, nakapagrehistro pa an saindang ofisina nin pagka-stranded nin mga pasahero asin byahero sa Matnog Port huli sa epekto kan naunambitang raot nin panahon.
Pagirumdom ni Berdin sa mga nakatenir sa mga landslide asin flashflood prone area na mag-ebakwar na nganing malikayan an mga siring kaining insidente.
