LEGAZPI CITY-Presenteng nasa United Arab Emirates (UAE) si President Ferdinand R. Marcos Jr. para sa one day working visit huli sa nagin imbitasyon ni UAE President Sheikh Mohamed bin Zayed Al Nahyan.
Pasado alas 11:09 nin banggi kan lunes, oras sa Pilipinas, kan makaabot sa Al Bateen Airport sa Abu Dhabi an Presidente kun sain pig-welcome siya kan UAE Minister of State na si Saeed Al Hajeri asin Foreign Affairs Secretary Ma. Theresa Lazaro kaiba an Philippine Ambassador kan UAE na si lfonso Ver.
Obheto kan pagbisita ni President Marcos an pagatendir sa Abu Dhabi Sustainability Week (ADSW), na taunang forum para sa mga plataporma asin internasyunal na kolaborasyon para sa mga kinakaipuhanang pankinabang aksyon.
Bago pa maghale an Presidente, pigaasigurar niya an pagtatao nin kontribusyon kan Pilipinas sa mga diskusyon sa isyung pangkinaban siring kan pangangaipohan sa enerhiya, pinansyal, food security, magin sa environmental protection.
Pagoolayan man an pagpirma kan duwang major bilateral agreements kan Pilipinas ain UAE manungod sa Comprehensive Economic Partnership Agreement (CEPA) asin sa Memorandum of Understanding (MOU) para sa kooperasyon sa depensa.
An sa Comprehensive Economic Partnership Agreement an sarong free trade agreement sa pagultanan kan Pilipinas asin UAE asin piglalaoman na magtatao nin mas mahewas na access kan Philippine market access sa Middle East, partikular na sa Gulf region, mantang an kooperasyon sa depensa an piglalaomang makakabusol sa kolaborasyon para sa mga makabagong teknolohiya.
Pigtawan doon man ni President Marcos na an nasabing kasunduaan an magtatao nin benipisyo magin sa haros 900,000 na mga Pilipino na nagtetenir sa UAE.
Pigkokonsidera man an pagbisita ni Marcos sa UAE bilang parte kan historya makalihis an pagbisita ni dating Presidente Gloria Macapagal-Arroyo kan taong 2008.
