LEGAZPI CITY- Pigtitimbang ngunyan kan nagkapira an posibleng tunay na rason sa ginibong pagsakyada kan Estados Unidos sa Venezuela na nagresulta sa pagkaka arestar ni President Nicolas Maduro.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na dae mainenegar na igwa talagang mga highly organized criminal organizations sa Venezuela.
Alagad aminado ining posibleng an cartel an naratibo sana kan Estados Unidos asin nasa likod kaini an mas dakulang rason siring na sana kan crude oil.
Marurumduman na saro an Venezuela sa mga nacion sa kinaban na igwang pinakadakulang oil reserve.
Karkulo kan nasabing propesor na posibleng saro sa mga rason sa likod kan lakdang kan Amerika iyo an langis sa Venezuela urog pang nalaog na man ini kan China.
Paliwanag ni Rosana na kun mawot kan sarong nacion na magin poderoso, kinakaipuhan na igwa ining dakulang oil reserve ngani na masuportaran an saindang nacion.
Dugang pa kaini na huli ta sadiring inisyatiba kan Amerika an pagsakyada sa Veezuela, dae maipagkakaila na makakaresibe ini nin pagkondenar alagad aminadong warang magigibo an ibang mga nacion huli sa pagigin poderoso kan Estados Unidos.
