Ipigdoon ni Pope Leo XIV kan Domingo na an kapakanan kan mga namamanwaang Venezuelan ang dapat mangibabaw makalihis na mapatalsik an presidente kan nacion na si Nicolas Maduro sa sarong operasyon na isinagibo kan Estados Unidos.
Makalihis an pagpangadyi kan Angelus sa St. Peter’s Square, sinabi kan kaenot-enoting American Pope na kaipuhan enoton an kapakana kan namamanwaang Venezuelan, higit sa anumang interes o konsiderasyon.
Segun ki Pope Leo, an paglipat kan kapangyarihan kan nacion an dapat magbukas nin landas pasiring sa pagtatapos kan karahasan asin sa pagsulong sa katarugan asin katoninongan. Tinawan-duon man niya an importansya kan pagrespeto sa soberanya kan Venezuela, ipaotob an nag-iiral na ley asin Konstitusyon, asin pangatamanan an direchos humanos asin sibil kan kada namamanwaan.
Inengganyar man kan Santo Papa an magkatuwang na paghiro nganing makapagpatindog nin sarong matoninong asin matatag na futuro para sa nacion, may espesyal na pagtugon sa mga tios na labing naapektaran kan matinding krisis pang-ekonomiya.
An pahayag kan Santo Papa an ginibo sarong aldaw makalihis dinakop si Maduro sa Caracas kan US special forces. Katakod kaini, sinabi ni US President Donald Trump na pamamayuhan kan Washington ang Venezuela asin gagamiton an reserbang krudo kan nacion.
