LEGAZPI CITY – Nanindugan an sarong transport group sa provincia kan Sorsogon na magayon alagad kulang an nagdadangadang na enot na rollback sa presyo kan produktong petrolyo ngonian na taon.
Segun ki Sorsogon Integrated Transport Federation (SORINTRAFED) President Ramon Dealca sa intrevista kan Bombo Radyo Legazpi na dapat an magpapadagos na an pagtapyas sa presyo kaini asin dae magserbing patikim sana kan gobierno.
Nakakasanayan na kaya suboot kan mga driver sa presente na sarong bes sana nagkakaigwa nin rollback alagad doble o tripleng beses man na nagkakaigwa nin mga oil-price hike.
Pagdoon niya man na siring kan mga pangapodan kan ibang transport group, napapanahon na dapat taasan an pamasahe sa mga traditional jeepney huli sa padagos man na pagtaas kan presyo kan mga babarakalon, mga pyesa kan jeep, asin produktong petrolyo.
Suspetya man kan opisyal na pwedesir na taktika sana an naunambitang rollback kan mga bigtime na oil companies kun kaya kahagadan niya na tabangan kan gobierno an mga nasa sektor kan transportasyon sa paagi nin pagbabarewas nin ayuda.
Afuera sa pabago-bagong presyo kan produktong petrolyo, pigkakahandalan niya man an pagbaba kan numero nin mga pasahero urog na ngonian na tapos na an holiday season asin padiit-diit nang nagbabalik an publiko sa saindang mga lugar.
Pangapodan ni Dealca sa gobierno na dangugon man an saindang agrangay asin dae na pagpabayaan ngonian na 2026.
