LEGAZPI CITY – Nakabantay man an mga personahes kan Bureau of Fire Protection Legazpi City mapadapit sa mga aktibidades kan Bulkang Mayon makalihis an pagsakat kan alert level kaini sa level 2.
Segun ki Legazpi City Fire Station Public Information Officer Senior Fire Officer 2 Norman Andes sa intrevista kan Bombo Radyo Legazpi na nakapreparar an saindang ofisina nganing tumabang enkaso kaipuhanon kan namamanwaan.
Nakahanda suboot an saindang mga mga firetruck nganing magbarewas nin tubig sa mga residentes na nakatenir sa evacuation centers.
Padagos man an saindang koordinasyon sa Lokal na gobierno na mapadapit sa saindang lakdang enkaso maglala an sitwasyon kan bulkan.
Pigdoon pa kan opisyal na may supisyente sindang numero kan mga bumbero na pwedesir i-deploy asin magtabang sa mga residenteng nakatenir sa 6KM permanent danger zone.
Nangapodan man siya sa mga namamanwaan na magsunod sa mga ipigtataong abiso kan mga otoridad huli ta para man sana ini sa saindang kaligtasan.
Pagirumdom ni Andes sa publiko na magin rigmat asin dae na magpasaway nganing malikayan an anumang klase nin peligro ngonian na nasa alert level 2 na an bulkang mayon.
