LEGAZPI CITY-Presenteng nasa alert level 2 an estado kan Bulkang Mayon makalihis na makapagrehistro nin padagos na paglangkaw kan rockfall events hale sa summit lava dome.
Poon kan Nobyembre 2025, igwa nin total na 599 na mga rockfall events an nairehistro, na nag-aaverage nin 10 kada aldaw, alagad ini naglangkaw sa 21 kada aldaw sa huring semana kan Disyembre.
Kan Disyembre 31, 2025, 47 na rockfall events an nairehistro, an pinakahalangkaw sa laog nin sarong taon.
Segun sa Phivolcs, an paglangkaw kan rockfall events sarong indikasyon kan pagdakula kan magmatic dome na posibleng magdara nin pagtuga, kapareho kan nangyari bago an pagtuga kan taong 2023.
Susog pa sa ahensya, sarong anomalya sa depormasyon kan bulkan sa nakalihis na 18 buwan na nagpapahiling kan padagos na paghuhubag kaini.
Huli digdi, mahigot na ipinagbabawal an paglaog sa 6-kilometer Permanent Danger Zone (PDZ) ngani maibitaran an peligro nin biglaang pagsabog, landslide, asin ballistic projectiles.
Inabisuhan man an mga lokal na gobierno na ihanda an mga komunidad para sa posibleng pag-ebakwar asin inabisuhan an mga piloto na likayan an paglupad harani sa kan bulkan.
